قصة رعب حقيقية ومريبة حدثت بالفعل

- من فترة امي بدأت تتابع برنامج غريب علي قناة مش مشهورة وتقريبا مش مصرية ولا حتي عربية ، بتابع برنامج لشخصية مريبة شكله مش مريح ابدا واللغة اللي بيتكلم بيها أغرب وفي ترجمة بتظهر علي الشاشة وقت عرض البرنامج.. في مرة بالصدفة كنت قاعد جنب والدتي وهي بتابع البرنامج الغريب دا ، شدني كلام الشخصية الغريبة في البرنامج وبدأت اركز  .

تخيل معايا في أقل من خمس دقائق الراجل دا قدر انه يقنعني بكلامه مع ان كلامه غريب جدا جدا بس عنده القدرة في أقناع اللي قدامه بطريقة غريبة برغم شكله ولبسه بس طريقة كلامه مبهرة .

زعقت مع والدتي وقفلت التلفزيون عشان أمنعها من سماع كلام الراجل دا ، الشخصية دي كانت بتتكلم عن التقارب من العالم الأخر وفتح الأبواب ليهم والتعايش معاهم ، انا مش فاهم هو ازاي في بني أدم عاقل يقول الكلام دا والغريب اني كنت شايف امي مركزة جدا مع كلامه ..

- في نفس اليوم فتحت جوجول وبدأت ابحث عن البرنامج وظهرلي ف محركات البحث كلام كتير عن البرنامج ، بس مش ظاهر أي معلومات عنه ولا أسم المذيع ولاا البلد الل بتذيع البرنامج بس البرنامج مش عربي ، لأن في عدد كبير بيتابعه في جميع انحاء العالم ، برغم أختلاف المعتقدات والأديان بس في ناس كتير بتوافق علي كلام الشخصية الغريبة دي ، ناس كتير مقيدة كلام البرنامج ، بس تقريبا عدد متابعي البرنامج ف مصر قليلين جدا ، يمكن يتعدوا علي صوابع الأيد ودا يمكن يكون بسبب قلة شهرة القناة علي القمر الصناعي .

- بدأت الااحظ تغير كبير في تصرفات أمي اللي مبقتش تهتم بوجبات البيت وبقيت أرجع من الشغل الااحظ ان البيت مش نضيف والأكل بقي معدوم تماما بقيت أجيب أكل من برا جاهز دايما..بحاول أقنع نفسي ان امي تعبانة ومحتاجة الراحة ، بس للأسف الموضوع وصل في حتة تانية مكنتش قادر أتخيل انه يبقي بالشكل دا .. أمي بتكلم نفسها في اوقات كتير بتتكلم وبتنفعل كمان في الكلام لدرجة اني كنت قاعد معاها بناكل فجأة بدأت تزعق وتصرخ وهي بتتكلم مع الكرسي الموجود قدامها الفاضي !! .

الكرسي فاضي مفهوش حد بس هي بتتكلم وكأن في حد قاعد فعلا معانا ..

في شئ غريب لاحظته بعد المحاولة الناجحة في أني أخليها تهدأ وتدخل أوضتها ترتاح ، رجعت مرة تانية للمطخ لاحظت أثر وعلامات حروق علي الكرسي ، الكرسي سخن جدا ، من هنا بدأت أقلق واحاول أحاوط واحمي امي ، كلمت دكتور صديق ليا دكتور نفسي يحاول يتابع حالاة امي ، يمكن يكون بسبب وفاة ابويا وفراقه ليها يمكن يكون دا السبب فعلا ..

عدي يومين علي متابعة أمي عند الدكتور والدكتور بدأ يطمني ان مفيش اي حاجة في امي وان دا مجرد زعل بسيط ..

بس للأسف انا متأكد ان مش مجرد زعل انا سامع صوت جي من تحت السرير دلوقتي بحاول اقنع نفسي ان دي مجرد اصوات في خيال عقلي بس للاسف انا بقيت شايف امي وهي واقفة في الركن المظلم من الاوضة واقفة بتخبط براسها بطريقة غريبة في الحيطة مش فاهم ايه اللي بيحصل اتحركت بخطوات هادية بقرب منها ، خايف ألمسها متخيل خايف المس امي ، حاولت اكلمها بس مفيش رد فعل منها بتأذي نفسها بخبط قوي في الجدار .

أخدت نفس عميق وشديتها ، شايف وشها الشاحب المخيف نظراتها ليا مخيفة دي مش امي لالا دا مسخ شيطاني ، دم في وشها وجروح مفتوحة اسنانها مكسورة والدم بينزل من كل وشها ، جسمها ساقع جدا ، بترتعش حاولت أحضنها بس عضتني بقوة العضة قوية لدرجة ان جزء من اللحم خرج من جسمي ..

وقعت علي الأرض من شدة الوجع مش حاسس بدراعي ، امي أختفت من الأوضة مفيش أثر ليها .

سامع صوت خبط وتكسير برا في الصالون ، قمت من علي الأرض وأتحركت بصعوبة ، الشقة بقيت أشبه بالجحيم نار في معظم الشقة حجات متكسرة علي الأرض كتي في حروف غريبة مكتوبة علي جدار الشقة ، أمي واقعة علي الأرض بتنزف من جسمها بس في شئ تاني موجود معانا دلوقتي انا حاسس بيه حاسس بتحركاته وصوت أنفاسه القريب مني ، مسكت أمي ونزلت بيها جري في الشارع الشقة النار فيها بتزيد بشكل غريب ، النار مسكت في الشقة كلها ، أنفجارات غريبة في الشقة .. 

شكل النار وهي خارجة من الشقة وانا واقف في الشارع وسط الناس المذهولة من المنظر ، مشهد مخيف ، بس انا مش مركز مع النار انا مركز معاه وهو واقف ورا الشباك ، انا شايفه كويس هو نفس الشخص مقدم البرنامج ..

انا لسة فاكر ملامحه ، للأسف امي ماتت مقدرتش ألحقها  تقرير المستشفي غريب سبب الوفاة هي حروق من الدرجة التانية في مناطق حساسة وخطيرة ..

برغم ان امي ملمستهاش النار بس ماتت بسبب حروق خطيرة 

الممرض سلمتني ورقة كانت موجودة مع امي في المستشفي ،

الورقة مش واضحة اوي بسبب الحروق اللي فيها بس قادر اقرأ بعض الكلام منها ، والمكتوب فيها كالأتي..

*ابني العزيز انا متأكدة انك ملاحظ تغير كبير تصرفاتي في الوقت الحالي عاوزك تبقي فاهم اني مش مجنونة انا بقيت شايفة أشخاص غريبة أشكالهم مرعبة موجدين معايا في الشقة مفيش حد قادر يشوفهم غيري ودا اللي لاحظته لما بتكون قاعد وهما موجدين معانا في نفس الوقت .. في وقت خروجك من الشقة  بخاف اوي وانا معاهم ، انا لو كنت قولتلك كنت هتقول عليا مجنونة ارجوك سامحني